Bakıda tıxacların qarşısını əhəmiyyətli formada alacaq layihələrdən biri də tramvay xətlərinin yenidən bərpa olunmasıdır.
Keçən il “Azərbaycan Dəmir Yolları” QSC-nin sədri Cavid Qurbanov bu məsələnin gündəmdə olduğunu bildirmişdi.

Hazırda vəziyyət nə yerdədir? Suala cavab tapmaq üçün “Azərbaycan Dəmir Yolları” QSC ilə əlaqə saxlanıldı.

"Tezexeber.com" xəbər verir ki, qurumun Mətbuat Xidmətindən Baku.ws-in sorğusuna cavab olaraq bildirdilər ki, hazırda bu məsələ ilə bağlı müzakirələr aparılır.

“Dövlət Şəhərsalma və Arxitektura Komitəsinin sifarişi ilə hazırlanan Bakı şəhərinin Baş planında nəzərdə tutulan tramvay xətləri ilə bağlı aidiyyəti qurumlarla razılaşma və müzakirələr aparılır”, - deyə qurumdan bildirilib.
Bildirək ki, hazırda tramvay xətlərinin çəkilməsi və ona nəzarət edilməsinin hansı quruma verilməsi də müzakirə obyektidir.

Xatırladaq ki, C.Qurbanov Bakıda bərpa olunacaq tramvay xətlərinin sxeminin müzakirə olunduğunu bildirmişdi:

“Vaxtilə Bakıda mövcud olmuş travmay xətlərinin sökülməsi ilə ölkəyə ziyan vurulub. İndi bu xətləri yenidən bərpa etmək çətindir. Odur ki, xarici şirkətlərə müraciət etmişik. Biznes-plan hazırlanır.

Tramvay xətləri Bakının Əhmədli və Biləcəri, Abşeron rayonunun Pirşağı, Sumqayıt şəhərinin Hacı Zeynalabdin Tağıyev qəsəbələrini əhatə edəcək”, - deyə o qeyd edib.

Azərbaycan Dövlət Şəhərsalma və Arxitektura Komitəsindən də bildirilib ki, şəhərdə mobilliyi artırmaq üçün müxtəlif ssenarilərə baxılır, ölçülür, qiymətləndirilir və tramvay potensial olaraq elə nəqliyyat növlərindən biri kimi qiymətləndirilir.